Home > ຂ່າວໄຟຟ້າ > ມອດ ​ໄຟຟ້າ 1 ຊົ່ວ​ໂມງ​ເພື່ອ​ຫລຸດຜ່ອນ​ພາວະ​ໂລກ​ຮ້ອນ

ມອດ ​ໄຟຟ້າ 1 ຊົ່ວ​ໂມງ​ເພື່ອ​ຫລຸດຜ່ອນ​ພາວະ​ໂລກ​ຮ້ອນ

ກົມສິ່ງແວດລ້ອມ, ອົງການຊັບພະຍາກອນນ້ຳ ຮ່ວມກັບນະຄອນຫລວງວຽງຈັນໄດ້ສະເຫລີມສະຫລອງວັນໂລກວັນທີ 27 ມີນາ ໂດຍການຈັດກິດຈະກຳມອດໄຟຟ້າທີ່ບໍ່ຈຳເປັນ ເວລາ 1 ຊົ່ວໂມງ ເພື່ອປະກອບສ່ວນຫລຸດຜ່ອນພາວະໂລກຮ້ອນ ໃນຄໍ່າຄືນວັນທີ 27 ມີນາ 2010 ຢູ່ປະຕູໄຊ ນະຄອນຫລວງວຽງຈັນ. ໂດຍມີທ່ານ ອາຊາງ ລາວລີ ຮອງນາຍົກລັດຖະມົນຕີ, ປະທານຄະນະກຳມະການສິ່ງແວດລ້ອມແຫ່ງຊາດ, ທ່ານພົນໂທ ດວງໃຈ ພິຈິດ ຮອງນາຍົກລັດຖະມົນຕີ, ລັດຖະມົນຕີວ່າ ການກະຊວງປ້ອງກັນປະເທດ ພ້ອມເຈົ້າຄອງນະຄອນຫລວງວຽງຈັນ, ບັນດາລັດຖະມົນຕີວ່າການ, ຊ່ວຍວ່າການ, ຫົວຫນ້າກົມ, ຮອງກົມ, ພະນັກງານ ແລະ ມວນຊົນນະຄອນ ຫລວງວຽງຈັນເຂົ້າຮ່ວມຢ່າງຄັບຄາຫນາແຫນ້ນ.

ທ່ານ ສົມບັດ ເຢຍລີເຮີ ເຈົ້າຄອງນະຄອນຫລວງວຽງຈັນ ກ່າວໃນໂອກາດເປີດພິທີມອດໄຟຟ້າ ຢ່າງເປັນທາງການວ່າ: ນີ້ເປັນເທື່ອທຳອິດທີ່ ສປປ ລາວໄດ້ລົງທະບຽນເຂົ້າຮ່ວມ ກິດຈະກຳມອດໄຟຟ້າ ເພື່ອສະເຫລີມສະຫລອງວັນໂລກວັນ ທີ 27 ມີນາ ທີ່ທົ່ວໂລກໄດ້ມີກິດຈະກຳນີ້ໃນປີ 2007 ເປັນຕົ້ນມາ ແລະ ກິດຈະກຳນີ້ຄືການໂຄສະນາ, ການປູກຈິດ ສຳນຶກ ໃຫ້ແກ່ປະຊາຊົນລາວທັງຊາດ ກໍ່ຄືນະຄອນຫລວງວຽງຈັນ ເປັນເຈົ້າມີສ່ວນຮ່ວມຫລຸດຜ່ອນ ການນຳໃຊ້ພະລັງງານ ເພື່ອປະກອບສ່ວນຢ່າງຕັ້ງຫນ້າ ເຂົ້າໃນການຫລຸດ ຜ່ອນໂລກຮ້ອນ.

ທ່ານນາງ ເຂັມແພງ ພົນເສນາ ລັດຖະມົນຕີປະຈຳສຳນັກງານນາຍົກລັດຖະມົນຕີ ຫົວຫນ້າອົງການຊັບພະຍາກອນນ້ຳ ແລະ ສິ່ງແວດລ້ອມກໍ່ໄດ້ກ່າວວ່າ: ຄືພວກເຮົາຮັບຮູ້ນຳ ກັນແລ້ວວ່າການປ່ຽນແປງດິນຟ້າອາກາດ ເປັນບັນຫາໃຫຍ່ທີ່ສົ່ງຜົນກະທົບໄປທົ່ວໂລກ ໂດຍສະເພາະໄດ້ສົ່ງຜົນກະທົບຕໍ່ຊີວະນາໆພັນ, ອຸນຫະພູມຂອງໂລກກໍ່ເພີ່ມສູງຂຶ້ນລວມທັງ ເກີດໄພແຫ້ງແລ້ງ, ໄພນ້ຳຖ້ວມ ແລະ ພະຍາດບົ້ງແມງ ກໍ່ເພີ່ມຂຶ້ນ ໂດຍສະພາບເຫລົ່ານີ້ ໄດ້ກວມເອົາທັງຂົງເຂດກະສິກຳ – ປ່າໄມ້, ຊັບພະຍາກອນນ້ຳ, ພະລັງງານ, ພື້ນຖານໂຄງລ່າງ ແລະ ສາທາລະນະສຸກ.

ປະຈຸບັນມວນມະນຸດ ພວມປະເຊີນກັບບັນຫາໄພພິບັດຕ່າງໆ ທີ່ມີລະດັບຄວາມຮຸນແຮງ, ມີລັກສະນະແຜ່ລາມ ແລະ ນັບມື້ຖີ່ຂຶ້ນຊັກໃຊ້ເຊິ່ງອີງຕາມບົດລາຍງານ ຂອງຄະນະຊ່ຽວຊານນາໆຊາດ ໄດ້ຊີ້ໃຫ້ເຫັນວ່າ: ໃນໄລຍະສະຕະວັດທີ 10-19, ອຸນຫະພູມຂອງໂລກບໍ່ປ່ຽນແປງ, ແຕ່ເລີ່ມແຕ່ສະຕະວັດທີ 20 ເປັນຕົ້ນມາ, ອຸນຫະພູມໂລກກໍ່ໄດ້ປ່ຽນແປງ ໂດຍເພີ່ມຂຶ້ນສະເລ່ຍ 0,8 ອົງສາເຊ ແລະ ໃນອະນາຄົດ ກໍ່ຄາດຄະເນໄວ້ວ່າອຸນຫະພູມຂອງໂລກ ຈະສູງຂຶ້ນແຕ່ 1,1​-​6,4 ອົງສາເຊໃນທົດສະວັດ ສຸດທ້າຍຂອງສະຕະວັດທີ 21 ຖ້າຫາກບໍ່ມີມາດຕະການຕ້ານ ຢ່າງເອົາການເອົາງານ ແນວໃດກໍ່ດີ, ສະພາບການດັ່ງກ່າວນີ້ ໄດ້ຮຽກຮ້ອງໃຫ້ປະຊາຄົມໂລກ ຈຳເປັນຕ້ອງໄດ້ຮ່ວມແຮງຮ່ວມໃຈ ຕໍ່ສູ້ກັບການປ່ຽນແປງດິນຟ້າອາກາດ ບົນພື້ນຖານແຫ່ງຄວາມຮັບຜິດຊອບຮ່ວມກັນ ຕາມຄວາມອາດສາມາດຂອງໃຜລາວ ໂດຍຕ້ອງມີມາດຕະການປະຕິບັດຢ່າງຈິງຈັງ ເພື່ອຫລຸດຜ່ອນ ການປ່ອຍອາຍພິດເຮືອນແກ້ວສູ່ຊັ້ນບັນຍາກາດ.

ໃນໂອກາດດັ່ງກ່າວທ່ານ ອາຊາງ ລາວລີ ຮອງນາຍົກລັດຖະມົນຕີ ໄດ້ໃຫ້ກຽດກົດສະວິດມອດໄຟຟ້າ ທີ່ບໍ່ຈຳເປັນໃຊ້ໄປພ້ອມກັນ ນັບແຕ່ປະຕູໄຊ, ຖະຫນົນລ້ານຊ້າງຫາຫໍຄຳ, ທຳນຽບລັດຖະບານ, ສະພາແຫ່ງຊາດ ແລະ ບ່ອນອື່ນໆ. ຈາກນັ້ນກໍ່ໄດ້ໄຕ້ທຽນໄຂ ແລະ ຮ່ວມຊົມການສະແດງສີລະປະວັນນະຄະດີ ທີ່ສ່ອງແສງໃຫ້ ເຫັນການພ້ອມກັນປົກປັກຮັກສາ ແລະ ບູລະນະສິ່ງແວດລ້ອມ ໂດຍການປົກປັກຮັກສາປ່າໄມ້, ບໍ່ຖິ້ມຂີ້ເຫຍື້ອຊະຊາຍ, ຫລຸດຜ່ອນການໃຊ້ພະລັງງານ ທີ່ບໍ່ເປັນປະໂຫຍດ, ປູກຕົ້ນໄມ້ ແລະ ອື່ນໆແຕ່ມື້ນີ້ເປັນຕົ້ນໄປ.

  1. No comments yet.
  1. No trackbacks yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / ປ່ຽນ )

Twitter picture

You are commenting using your Twitter account. Log Out / ປ່ຽນ )

Facebook photo

You are commenting using your Facebook account. Log Out / ປ່ຽນ )

Google+ photo

You are commenting using your Google+ account. Log Out / ປ່ຽນ )

Connecting to %s

%d bloggers like this: