Home > ຂ່າວໄຟຟ້າ > ແຜນແມ່ບົດໄຟແສງສະຫວ່າງຂອງນະຄອນຫຼວງ ໄດ້ຖືກສ້າງສຳເລັດ

ແຜນແມ່ບົດໄຟແສງສະຫວ່າງຂອງນະຄອນຫຼວງ ໄດ້ຖືກສ້າງສຳເລັດ


ໂຄງການແຜນແມ່ບົດໄຟສະຫວ່າງເຍືອງທາງ ແລະ ເຍືອງປະດັບຕົວເມືອງນະຄອນຫຼວງວຽງຈັນ ແມ່ນເປັນໂຄງການໜຶ່ງທີ່ໄດ້ຮັບທຶນຊ່ວຍເຫຼືອລ້າຈາກ ລັດຖະບານສາທາລະນະລັດຝຣັ່ງ ຊຶ່ງໄດ້ມອບໃຫ້ບໍລິສັດ ຊີຕິລູມຂອງຝຣັ່ງ ເປັນຜູ້ຈັດຕັ້ງປະຕິບັດໃນມູນຄ່າທັງໝົດ 279.000 ເອີໂຣ ແລະ ໄດ້ເລີ່ມຈັດ ຕັ້ງປະຕິບັດແຕ່ກາງເດືອນມິຖຸນາ 2009 ແລະ ສຳເລັດສົມບູນໃນທ້າຍເດືອນພະຈິກ 2009 ຜ່ານມານີ້.
ພາຍຫຼັງສຳເລັດໂຄງການດັ່ງກ່າວ ກໍໄດ້ຖືກມອບໃຫ້ເຈົ້າຂອງໂຄງການ ເພື່ອຈັດຕັ້ງປະຕິບັດໃນຕໍ່ໜ້າ ຊຶ່ງພິທີມອບ-ຮັບເອກະສານ ກ່ຽວກັບໂຄງການດັ່ງ ກ່າວໄດ້ມີຂຶ້ນວັນທີ 19 ມັງກອນ 2010 ນີ້ ທີ່ໂຮງແຮມລາວພລາຊາ ນະຄອນຫຼວງວຽງຈັນ ກ່າວມອບໂດຍທ່ານ ມີແຊນ ລາໂຕ້ ຜູ້ອຳນວຍການບໍລິສັດ ຊີຕິລູມ ຂອງປະເທດຝຣັ່ງ ແລະ ກ່າວຮັບໂດຍທ່ານ ບຸນຈັນ ສິນທະວົງ ຮອງເຈົ້າຄອງນະຄອນຫຼວງວຽງຈັນ ແລະ ເຂົ້າຮ່ວມເປັນສັກຂີພິຍານມີທ່ານ ສົມບັດ ເຢຍລີເຮີ ເຈົ້າຄອງນະຄອນຫຼວງວຽງຈັນ ທ່ານ ຟອງຊົວ ເຊເນໂມ ທູດຝຣັ່ງ ປະຈຳ ສປປ ລາວ ຜູ້ຕາງໜ້າຈາກກະຊວງ ສຳນັກງານ ເຈົ້າ ເມືອງ 4 ເມືອງໃນ ຫົວໜ້າ ພະແນກການ ອພບ ແລະ ພະນັກງານທີ່ກ່ຽວຂ້ອງທັງສອງຝ່າຍ.
ແຜນແມ່ບົດໄຟເຍືອງທາງ ແລະ ເຍືອງປະດັບເອ້ສະຖານທີ່ຕ່າງໆໃນເມືອງຂອງນະຄອນຫຼວງວຽງຈັນ ແມ່ນມີຄວາມສຳຄັນ ແລະ ຈຳເປັນທີ່ສຸດຊຶ່ງຈະ ເປັນບ່ອນອີງໃຫ້ແກ່ການລົງທຶນໃສ່ລະບົບໄຟຟ້າ ແສງສະຫວ່າງທັງໝົດ ຊຶ່ງຈະເຮັດໃຫ້ຕົວເມືອງມີຄວາມແຈ້ງສະຫວ່າງ ຈະມີສີສັນສວຍງາມ ແລະ ມີລະ ບົບໄຟຟ້າທີ່ມີມາດຕະຖານ ເຕັກນິກ ເຕັກໂນໂລຊີໃໝ່ ສະດວກແກ່ການຄຸ້ມຄອງນຳໃຊ້ ຊຶ່ງປັດຈຸບັນມີຫຼາຍຕົວເມືອງໃນໂລກ ໄດ້ເລີ່ມນຳໃຊ້ແລ້ວ ແລະ ສາມາດປະຢັດກະແສໄຟຟ້າໄດ້ເຖິງ 30% (ທຽບໃສ່ມາດຖານເຕັກນິກໃນປັດຈຸບັນ) ອີກດ້ານໜຶ່ງໂຄງການດັ່ງກ່າວແມ່ນເປັນການປະກອບສ່ວນ ຜັນຂະຫຍາຍນະໂຍບາຍ 6ສ ຂອງນະຄອນຫຼວງວຽງຈັນ ໂດຍສະເພາະ ສ ສະຫວ່າງ ຊຶ່ງຈະເປັນການປະກອບສ່ວນໃຫ້ແກ່ການສະເຫຼີມສະຫຼອງວຽງ ຈັນ ເປັນນະຄອນຫຼວງ ຄົບຮອບ 450 ປີ ໃນທ້າຍປີ 2010 ນີ້.
ໂຄງການດັ່ງກ່າວຍັງຈະມີການສືບຕໍ່ໃນການຈັດຕັ້ງປະຕິບັດຕໍ່ໄປ ໃນໄລຍະ 15 ປີ ຊຶ່ງແຜນແມ່ບົດນີ້ຈະເປັນພື້ນຖານ ແລະ ເປັນຕົວຊ່ວຍໃຫ້ແກ່ນະ ຄອນຫຼວງວຽງຈັນ ເພື່ອຈະໄດ້ຊອກທຶນຮອນມາພັດທະນາໂຄງການກໍຄືປັບປຸງໄຟຟ້າທີ່ມີຢູ່ແລ້ວນັ້ນ ສຳລັບທຶນທີ່ຈະມາພັດທະນາແມ່ນມີຄວາມຕ້ອງການ ສູງເຖິງ 35 ລ້ານໂດລາ.
ຫຼັງຈາກມອບ-ຮັບເອກະສານ ໂຄງການດັ່ງກ່າວນັ້ນແລ້ວ ຕອນທ້າຍຍັງມີພິທີປະດັບຫຼຽນໄຊແຮງງານຊັ້ນ 3 ຈາກລັດຖະບານລາວ ໃຫ້ແກ່ທ່ານ ປີແອ ດານຽນ ທີ່ປຶກສາການຄ້າຕ່າງປະເທດຂອງລັດຖະບານຝຣັ່ງ ແລະ ທ່ານ ມີແຊນ ລາໂຕ້ ຜູ້ອຳນວຍການຂອງບໍລິສັດ ຊີຕິລູມ ປະເທດຝຣັ່ງ ທີ່ມີຜົນງານ ໃນການປະກອບສ່ວນລະດົມທຶນຮອນຈາກລັດຖະບານ ແລະ ປະຊາຊົນຝຣັ່ງ ຫຼາຍກ່ວາ 5 ແສນເອີໂຣ ເຂົ້າໃນການພັດທະນາໂຄງການໄຟແສງສະ ຫວ່າງຂອງນະຄອນຫຼວງວຽງຈັນ ຕາງໜ້າໃຫ້ລັດຖະບານ ໂດຍແມ່ນທ່ານເຈົ້າຄອງນະຄອນຫຼວງວຽງຈັນ ເປັນຜູ້ຂຶ້ນປະດັບຫຼຽນດັ່ງກ່າວ.

ໝວດໝູ່:ຂ່າວໄຟຟ້າ
  1. No comments yet.
  1. No trackbacks yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / ປ່ຽນ )

Twitter picture

You are commenting using your Twitter account. Log Out / ປ່ຽນ )

Facebook photo

You are commenting using your Facebook account. Log Out / ປ່ຽນ )

Google+ photo

You are commenting using your Google+ account. Log Out / ປ່ຽນ )

Connecting to %s

%d bloggers like this: