ປະ­ເທດ​ສະ­ມາ­ຊິກ​ອາ​ຊຽນ ສະ­ເໜີ​ໃຫ້​ຂະ­ຫຍາຍ​ຕາ​ຂ່າຍ​ໄຟ­ຟ້າ​ເຊື່ອມ​ຕໍ່​ກັນ

  ກອງ​ປະ­ຊຸມ​ເຈົ້າ​ໜ້າ­ທີ່​ອາ​ວຸໂສ​ດ້ານ​ພະ­ລັງ­ງານ​ອາ​ຊຽນ ຄັ້ງ​ທີ 32 ໄດ້​ສຳ­ເລັດ​ລົງ​ດ້ວຍ​ຜົນ​ສຳເລັດ​ຢ່າງ​ຈົບ­ງາມ ພາຍ­ຫຼັງ​ທີ່​ໄດ້ດຳ­ເນີນ​ມາ​ແຕ່​ວັນ​ທີ 9-13 ມິ​ຖຸນາ 2014 ທີ່​ໂຮງ­ແຮມ​ຫຼວງ​ພະບາງ​ວິວ ເຊິ່ງ​ພິ­ທີ​ປິດ​ກອງ​ປະ­ຊຸມດັ່ງ­ກ່າວ​ໄດ້​ມີ​ຂຶ້ນ​ວັນ​ທີ 13 ມິ­ຖຸ­ນາຜ່ານ​ມາ​ນີ້ ໂດຍ​ເປັນ​ປະ­ທານ​ຂອງທ່ານ ດຣ. ດາວ​ວົງ ພອນ​ແກ້ວ ຫົວ­ໜ້າກົມ​ນະ­ໂຍ­ບາຍ ແລະ ແຜນ​ພະ­ລັງ­ງານ ກະ­ຊວງ​ພະ­ລັງງານ ແລະ ບໍ່​ແຮ່ ຫົວ­ໜ້າ​ເຈົ້າໜ້າ­ທີ່​ອາ­ວຸ­ໂສ​ຝ່າຍ​ລາວ ມີຫົວໜ້າ​ເຈົ້າ​ໜ້າ­ທີ່​ອາ­ວຸ­ໂສ​ປະ­ເທດ​ສະມາ​ຊິກ ກອງ​ເລ­ຂາ​ອາ​ຊຽນ ແລະ ຄູ່​ຮ່ວມ​ເຈລະ­ຈາ​ເຂົ້າ​ຮ່ວມ.

ໃນ​ວາ­ລະ​ກອງ​ປະ­ຊຸມ​ຄັ້ງ​ນີ້ ຍັງ​ມີ​ກອງ​ປະ­ຊຸມ​ປີກ​ຍ່ອຍ​ປິ່ນອ້ອມ​ປະ­ມານ 10 ກອງ​ປະ­ຊຸມ ໃນນີ້ ບັນ­ດາ​ຜູ້​ແທນກໍ່​ໄດ້​ລົງ​ເລິກ​ປຶກສາ​ຫາ­ລື​ກ່ຽວ​ກັບ​ສະ­ພາບ​ການພັດ­ທະ­ນາ​ ດ້ານ​ພະ­ລັງ­ງານ ກິດຈະ​ກຳ​ຕ່າງໆ​ດ້ານ​ພະ­ລັງ­ງານ​ວ່າມີ​ຄວາມ​ຄືບ​ໜ້າ​ແນວ­ໃດ​ແດ່ ແນໃສ່​ເພື່ອ​ເປັນ​ການ​ກະ­ກຽມ​ລາຍງານ​ໃຫ້​ກອງ​ປະ­ຊຸມ​ລັດ­ຖະ­ມົນ­ຕີ ດ້ານ​ພະ­ລັງ­ງານ​ອາ​ຊຽນ ເຊິ່ງ​ຈະຈັດ​ຂຶ້ນ​ໃນ​ເດືອນ​ກັນ­ຍາ 2014 ຢູ່ນະ­ຄອນ­ຫຼວງ​ວຽງ​ຈັນ ນອກ​ນີ້ຍັງໄດ້​ປຶກ­ສາ​ຫາ­ລື​ກ່ຽວກັບ​ຄວາມໝັ້ນ­ຄົງທາງ​ດ້ານ​ພະ­ລັງ­ງານ​ ນ້ຳມັນ​ ແລກ­ປ່ຽນ​ບົດ­ຮຽນ​ດ້ານ​ການນຳ​ໃຊ້​ພະ­ລັງ­ງານ​ເຊື້ອ​ໄຟ​ ວ່າ​ເຊື້ອໄຟ​ຊະ­ນິດ​ໃດ​ທີ່​ຈະ​ມີ​ການ​ນຳ​ໃຊ້ຫຼາຍ​ກວ່າ​ໝູ່​ໃນ​ອະ­ນາ­ຄົດ ລວມທັງ​ເຕັກ​ໂນ​ໂລ​ຊີ​ຕ່າງໆ ໂດຍ​ເລັ່ງໃສ່​ການ​ນຳໃຊ້​ພະ­ລັງ­ງານ​ແບບປະ­ຢັດ ການ​ນຳ​ໃຊ້​ພະ­ລັງ­ງານນິວ​ເຄຼຍ ​ໃຫ້​ເກີດ​ຜົນ​ດີ ໂດຍ​ສະເພາະນຳ​ໃຊ້​ເຂົ້າ​ໃນ​ການຜະ­ລິດໄຟ­ຟ້າ​ການ​ແພດ ແລະ ອື່ນໆ.

ທ່ານ ດຣ. ດາວ​ວົງ ພອນ​ແກ້ວ ໄດ້​ກ່າວ​ວ່າ: ກອງ​ປະ­ຊຸມ​ຄັ້ງ​ນີ້ ນອກ­ຈາກ ສປປ ລາວ ຈະ​ໄດ້​ຮັບຜົນ​ປະ­ໂຫຍດຈາກ​ການ​ເປັນ​ເຈົ້າພາບ​ແລ້ວ ພວກ​ເຮົາ​ຍັງ​ຮັກ­ສາໄດ້​ການ​ພົວ­ພັນ​ຮ່ວມ​ມື​ທີ່​ດີ ລະຫວ່າງປະ­ເທດ​ສະ­ມາ­ຊິກ​ອາຊຽນ ກໍ່​ຄື​ຄູ່​ຮ່ວມ​ເຈລະ­ຈາ​ຕ່າງໆ ລວມເຖິງ​ບັນ­ດາ​ຂໍ້​ມູນ​ທາງ​ດ້ານ​ການພັດ­ທະ­ນາ​ພະ­ລັງ­ງານ​ຢ່າງ​ຫຼວງຫຼາຍ ເຊິ່ງ​ຈະ​ເປັນ​ຜົນ​ດີ​ໃຫ້​ແກ່ການ​ພັດ­ທະ­ນາ​ດ້ານ​ພະ­ລັງ­ງານຂອງປະເທດໃຫ້​ມີ​ ການ​ຂະຫຍາຍ​ຕົວ​ໃນ​ອະ­ນາ­ຄົດ  ພ້ອມ​ນີ້ໃນ​ກອງ​ປະ­ຊຸມ​ບັນ­ດາ​ຜູ້​ແທນ​ຍັງໄດ້​ມີ​ການ​ສະ­ເໜີ​ໃຫ້​ມີ​ການ​ ເລັ່ງລັດ​ດ້ານ​ການ​ຂະ­ຫຍາຍ​ຕາ​ຂ່າຍໄຟ­ຟ້າ​ເຊື່ອມ​ຕໍ່​ກັນ ​ໃນ​ບັນ­ດາ​ປະເທດ​ອາ​ຊຽນ ລວມ​ທັງ​ການ​ປັບປຸງ​ລະ­ບຽບ​ການ​ຕ່າງໆ​ຂອງ​ແຕ່ລະ​ປະ­ເທດ ​ໃຫ້​ມີຄວາມ​ແທດເໝາະ ເພື່ອ​ກ້າວ​ໄປ​ສູ່​ການ​ຊື້-ຂາຍ​ໄຟ­ຟ້າ​ແບບ​ຫຼາຍ​ຝ່າຍ ເນື່ອງຈາກ​ໄລ­ຍະ​ຜ່ານ​ມາ​ມີ​ແຕ່​ການ​ຊື້-ຂາຍແບບ​ສອງ​ຝ່າຍ​ເທົ່າ​ນັ້ນ.

http://www.vientianemai.net/teen/khao/1/12036

ສອງບໍລິສັດລາວ ຕິດອັນດັບໃນການປະຢັດພະລັງງານອາຊຽນ

  ກະຊວງ​ພະລັງງານ ແລະ ບໍ່​ແຮ່ ກົມ​ພະລັງງານ ໄດ້​ຈັດ​ກອງ​ປະຊຸມ​ກ່ຽວ​ກັບ​ວຽກ​ງານ​ປະຢັດ​ພະລັງງານ​ອາ​ຊຽນ​ຂຶ້ນ ໃນ​ລະຫວ່າງ​ວັນ​ທີ 26-29 ພຶດສະພາ 2014 ທີ່​ຜ່ານ​ມາ ທີ່​ໂຮງແຮມ​ລາວ​ພລາ​ຊາ ໂດຍ​ເປັນ​ປະທານ​ຂອງ​ທ່ານ ບົວ​ເທບ ມາໄລ​ຄຳ ຮອງ​ຫົວໜ້າ​ກົມ​ບໍລິຫານ​ພະລັງງານ ມີ​ຄະນະ​ກຳມະການ​ຈາກ​ບັນດາ​ປະເທດ​ອາ​ຊຽນ​ເຂົ້າ​ຮ່ວມ.

ກອງ​ປະຊຸມ​ໃນ​ຄັ້ງ​ນີ້​ຈັດ​ຂຶ້ນ ເພື່ອ​ຄັດ​ເລືອກ​ເອົາ​ບັນດາ​ຕຶກ​ອາຄານ ໂຮງ​ຈັກ ໂຮງງານ ທີ່​ມີ​ການ​ປະຢັດ​ພະລັງງານ​ດີເດັ່ນ​ປະຈຳ​ປີ 2014 ໂດຍ​ໄດ້​ແບ່ງ​ອອກ​ເປັນ​ຫຼາຍ​ປະເພດ ປະກອບ​ມີ: ປະເພດ​ບໍລິຫານ​ຈັດການ​ພະລັງງານ ປະເພດ​ປະຢັດ​ພະລັງງານ​ຕຶກ​ອາຄານ​ໃໝ່ ປະເພດ​ປະຢັດ​ພະລັງງານ​ຈາກ​ການ​ຟື້ນ​ຟູ​ສ້ອມແປງ​ຕຶກ​ອາຄານ​ເກົ່າ ປະເພດ​ປະຢັດ​ພະລັງງານ​ຂອງ​ຕຶກ​ອາຄານ ທີ່​ອອກ​ແບບ​ກໍ່ສ້າງ​ໂດຍ​ອາໄສ​ທຳ​ມະ​ຊາດ​ຊ່ວຍ ເພື່ອ​ບໍ່​ໃຫ້​ໃຊ້​ໄຟຟ້າ​ຫຼາຍ​ປະເພດ ການ​ປະຢັດ​ພະລັງງານ ໂດຍ​ນຳ​ໃຊ້​ເຕັກ​ໂນ​ໂລ​ຊີ​ໃໝ່ ແລະ ປະເພດ​ຕຶກ​ສີຂຽວ ໂດຍ​ໄດ້​ມີ​ເອກະສານ​ເຂົ້າ​ມາ​ແຂ່ງຂັນ​ຈາກ​ບັນດາ​ປະເທດ​ອາ​ຊຽນ ລວມ 50 ໂຄງການ.

ໃນ​ນີ້ ​ສປປ ລາວ ໄດ້​ສົ່ງ​ເຂົ້າ​ຈຳນວນ 2 ໂຄງການ ຜ່ານ​ການ​ຕັດສິນ​ຂອງ​ຄະນະ​ກຳມະການ ເຫັນ​ວ່າ​ລັດ​ວິ​ສາ​ຫະ​ກິດ​ໄຟຟ້າ​ລາວ ໄດ້​ຄະແນນ​ຮອງ​ອັນ​ດັບ 1 ໃນ​ປະເພດ​ບໍລິຫານ​ຈັດການ​ພະລັງງານ​ໃນ​ພາກ​ຕຶກ​ອາຄານ ແລະ ບໍລິສັດ​ເບຍ​ລາວ ໄດ້​ຮັບ​ລາງວັນ​ອັນ​ດັບ 2 ໃນ​ປະເພດ​ບໍລິຫານ​ຈັດການ​ພະລັງງານ​ໃນ​ໂຮງງານ ສ່ວນ​ຄະແນນ​ຊະນະ​ເລີດ ໄດ້ແກ່​ປະເທດ​ສິງກະໂປ ໄທ ອິນ​ໂດ​ເນ​ເຊຍ.

ປະເທດອາຊຽນ ສືບຕໍ່ຮ່ວມມືສ້າງຄວາມເຂັ້ມແຂງ ໃນການປະຢັດພະລັງງານ

  ກະຊວງ​ພະລັງງານ ແລະ ບໍ່​ແຮ່ ກົມ​ບໍລິຫານ​ພະລັງງານ ໄດ້​ຈັດ​ກອງ​ປະຊຸມ​ປະຈຳ​ປີ ຂອງ​ວຽກ​ງານ​ການ​ປະຢັດ​ພະລັງງານ​ອາ​ຊຽນ​ຂຶ້ນ ໃນ​ວັນ​ທີ 30 ພຶດສະພາ 2014 ທີ່​ໂຮງແຮມ​ລາວ​ພລາ​ຊາ ໂດຍ​ມີ​ທ່ານ ​ດຣ. ດາວ​ວົງ ພອນ​ແກ້ວ ຫົວໜ້າ​ກົມ​ນະໂຍບາຍ ແລະ ແຜນ​ພະລັງງານ ທັງ​ເປັນ​ຫົວໜ້າ​ເຈົ້າ​ໜ້າທີ່​ອາວຸໂສ​ພະລັງງານ​ອາ​ຊຽນ ພ້ອມ​ດ້ວຍ​ທ່ານ ​ດຣ. Harrdiv H. Situmeang ຜູ້​ບໍລິຫານ​ສູນ​ພະລັງງານ​ອາ​ຊຽນ ແລະ ມີ​ຜູ້​ປະສານ​ງານ​ວຽກ​ງານ​ປະຢັດ​ພະລັງງານ​ຈາກ​ບັນດາ​ອາ​ຊຽນ ສູນ​ປະຢັດ​ພະລັງງານ​ຍີ່ປຸ່ນ ພ້ອມ​ດ້ວຍ​ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

ການ​ຈັດ​ກອງ​ປະຊຸມ​ດັ່ງກ່າວ​ຂຶ້ນ ເພື່ອ​ສະຫຼຸບ​ຄືນ​ວຽກ​ງານ​ຂອງ​ແຕ່​ລະ​ປະເທດ​ໃນ 1 ປີຜ່ານມາ ພ້ອມ​ກັນ​ນີ້ ກໍ່​ໄດ້​ພິຈາລະນາ​ໜ້າ​ວຽກ​ຕ່າງໆ​ເພື່ອ​ສືບຕໍ່ ແລະ ສ້າງ​ເປັນ​ວຽກ​ໃໝ່​ໃນ​ສົກ​ປີ​ຕໍ່​ໄປ ເພື່ອ​ສ້າງ​ຄວາມ​ເຂັ້ມແຂງ​ໃນ​ວຽກ​ງານ​ດັ່ງກ່າວ ໃຫ້​ແກ່​ບັນດາ​ປະເທດ​ອາ​ຊຽນ.

ສູນ​ປະຢັດ​ພະລັງງານ​ຍີ່ປຸ່ນ ແມ່ນ​ເຫັນ​ດີ​ໃຫ້ການ​ສືບຕໍ່​ຊ່ວຍເຫຼືອ​ສະເພາະ​ແກ່ ​ສປປ ລາວ ແລະ ເຫັນ​ວ່າ​ມີ​ຄວາມ​ຈຳເປັນ ທີ່​ຕ້ອງ​ໄດ້​ພັດທະນາ​ບາງ​ໜ້າ​ວຽກ​ຕົ້ນຕໍ ເຊິ່ງ​ປະກອບ​ມີ​ການ​ສ້າງ​ລະບຽບ​ການ ວ່າ​ດ້ວຍ​ການ​ປະຢັດ​ພະລັງງານ ລະບຽບ​ການ​ວ່າ​ດ້ວຍ​ການ​ຄຸ້ມ​ຄອງ​ຄຸນ​ນະ​ພາບ​ຂອງ​ເຄື່ອງໃຊ້​ໄຟຟ້າ ການ​ສ້າງ​ຄວາມ​ເຂັ້ມແຂງ​ທາງ​ດ້ານ​ວິຊາ​ການ ການ​ສ້າງ​ຈິດ​ສຳນຶກ​ໃນ​ການ​ປະຢັດ​ພະລັງງານ ໃນ​ຂະແໜງການ​ສຶກ​ສາ ໂດຍ​ເລີ່ມ​ລະດັບ​ປະຖົມ​ສຶກ​ສາ ໂດຍ​ສະເພາະ​ແມ່ນ​ການ​ໂຄສະນາ​ເຜີຍແຜ່​ໃຫ້​ຜູ້​ຊົມໃຊ້​ໄຟຟ້າ ໃນ​ການ​ປະຢັດ​ພະລັງງານ ເຊິ່ງ​ຜ່ານ​ມາ ກະຊວງ​ພະລັງງານ ແລະ ບໍ່​ແຮ່ ກໍ່​ໄດ້​ແຈ້ງ​ການ​ໃຫ້​ທຸກ​ພາກສ່ວນ ຊ່ວຍ​ກັນ​ປະຢັດ​ພະລັງງານ​ໄຟຟ້າ​ຢູ່ ​ສປປ ລາວ ແລະ ມີ​ຄວາມ​ຈຳເປັນ​ທີ່​ຈະ​ຕ້ອງ​ໄດ້​ສືບຕໍ່​ດຳເນີນ​ໄປ​ເປັນ​ປະຈຳ ແລະ ຮຽກຮ້ອງ​ເຖິງ​ຜູ້​ເປັນ​ເຈົ້າ​ຂອງ​ເຮືອນ ຕຶກ​ອາຄານ ແລະ ໂຮງ​ຈັກ​ໂຮງງານ ຈະ​ຕ້ອງ​ເປັນ​ເຈົ້າ​ການ​ຊ່ວຍ​ດຳເນີນ​ການ​ວຽກ​ງານ​ດັ່ງກ່າວ.

http://www.vientianemai.net/teen/khao/1/11926

 

ເຈົ້າໜ້າທີ່ອາວຸໂສປະເທດສະມາຊິກອາຊຽນ ທົບທວນການຮ່ວມມືດ້ານພະລັງງານ

  ກອງ​ປະຊຸມ​ເຈົ້າ​ໜ້າທີ່​ວຸ​ໂສ​ດ້ານ​ພະລັງງານ​ອາ​ຊຽນ ຄັ້ງ​ທີ 32 ໄດ້​ມີ​ຂຶ້ນ​ໃນ​ລະຫວ່າງ​ວັນ​ທີ 9-13 ມິຖຸນາ 2014 ຢູ່​ໂຮງແຮມ​ຫຼວງ​ພະ​ບາງ​ວິວ ແຂວງ​ຫຼວງ​ພະ​ບາງ ໂດຍ​ເປັນ​ປະທານ​ຂອງ​ທ່ານ ວິ​ຣະ​ພົນ ວິ​ຣະ​ວົງ ລັດຖະມົນຕີ​ຊ່ວຍ​ວ່າການ​ກະຊວງ​ພະ​ລັງ​​ງານ ແລະ ບໍ່​ແຮ່ ຫົວໜ້າ​ເຈົ້າ​ໜ້າທີ່​ອາວຸໂສ​ຝ່າຍ​ລາວ ມີ​ທ່ານ ​ດຣ. ບົວ​ຄົງ ນາມ​ມະ​ວົງ ຮອງ​ເຈົ້າແຂວງ​ຫຼວງ​ພະ​ບາງ ພ້ອມ​ດ້ວຍ​ຫົວໜ້າ​ເຈົ້າ​ໜ້າທີ່​ອາວຸໂສ​ປະເທດ​ສະມາຊິກ ກອງ​ເລຂາ​ອາ​ຊຽນ ຄູ່​ຮ່ວມ​ເຈລະຈາ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ຈຸດປະສົງ​ຂອງ​ກອງ​ປະຊຸມ​ຄັ້ງ​ນີ້ ເພື່ອ​ທົບ​ທວນຄືນ ບັນດາ​ວຽກ​ງານ​ການ​ຮ່ວມ​ມື​ທາງ​ດ້ານ​ພະລັງງານ​ໃນ 1 ປີຜ່ານມາ ເຊິ່ງ​ນອນ​ຢູ່​ໃນ​ແຜນການ​ຮ່ວມ​ມື​ດ້ານ​ພະລັງງານ ສົກ​ປີ 2010-2015 ນອກ​ນີ້​ຍັງ​ໄດ້​ສະຫຼຸບ​ຕີ​ລາຄາ​ຄືນ ບັນດາ​ໜ້າ​ວຽກ​ເພື່ອ​ກະກຽມ​ລາຍ​ງານ ໃຫ້​ກອງ​ປະຊຸມ​ລັດຖະມົນຕີ​ດ້ານ​ພະລັງງານ​ອາ​ຊຽນ ເຊິ່ງ​ຈະ​ຈັດ​ຂຶ້ນ​ໃນ​ເດືອນ​ກັນຍາ 2014 ຢູ່​ນະຄອນຫຼວງ​ວຽງ​ຈັນ.

ທ່ານ ວິ​ຣະ​ພົນ ວິ​ຣະ​ວົງ ໄດ້​ກ່າວ​ວ່າ: ກອງ​ປະຊຸມ​ຄັ້ງ​ນີ້ ຈະ​ເປັນ​ການ​ເສີມ​ຂະຫຍາຍ​ການ​ຮ່ວມ​ມື ປຶກສາ​ຫາລື ແລະ ແລກປ່ຽນ​ຄວາມ​ຄິດ​ເຫັນ​ເຊິ່ງ​ກັນ ແລະ ກັນ ເພື່ອ​ຮັບປະກັນ​ຄວາມ​ຍືນ​ຍົງ ໃນ​ການ​ນຳ​ໃຊ້​ພະລັງງານ​ໃນ​ອະນາຄົດ ບັນດາ​ປະເທດ​ອາ​ຊຽນ ແມ່ນ​ກຸ່ມ​ປະເທດ​ທີ່​ມີ​ເສດຖະກິດ​ຂະຫຍາຍຕົວ​ໄວ​ໃນ​ໂລກ ແລະ ການ​ຂະຫຍາຍຕົວ​ນັ້ນ ມັນ​ມີ​ຄວາມ​ຕ້ອງການ​ທາງ​ດ້ານ​ພະລັງງານ​ທີ່​ເພີ່ມ​ຂຶ້ນ ເຊິ່ງ​ນອກຈາກ​ການ​ພັດທະນາ​ທາງ​ດ້ານ​ພະລັງງານ​ໄຟຟ້າ ກໍ່​ຕ້ອງ​ໃຫ້​ມີ​ການ​ສົ່ງເສີມ​ການ​ພັດທະນາ ທາງ​ດ້ານ​ພະລັງງານ​ທົດ​ແທນ​ຕື່ມ​ອີກ.

ທີ່ມາ http://www.vientianemai.net/teen/khao/1/11994

ຫາລືການຈັດການຂີ້ເຫຍື້ອ ເພື່ອເປັນພະລັງງານນຳໃຊ້ໃນໂຮງງານ

  ກອງ​ປະຊຸມ​ກ່ຽວ​ກັບ​ການ​ນຳ​ສະເໜີ ຜົນ​ການ​ປຶກສາ​ຫາລື​ການ​ຈັດການ​ກ່ຽວ​ກັບ​ຂີ້​ເຫຍື້ອ ຢູ່​ນະຄອນຫຼວງ​ວຽງ​ຈັນ ແລະ ແນວທາງ​ການ​ພັດທະນາ​ຂີ້​ເຫຍື້ອ ເປັນ​ພະລັງງານ​ນຳ​ໃຊ້​ໃນ​ອຸດສາຫະກຳ​ໂຮງງານ​ຊີມັງ ໄດ້​ມີ​ຂຶ້ນ​ວັນ​ທີ 5 ມິຖຸນາ 2014 ຢູ່​ໂຮງແຮມ​ເມີ​ກຽວ ໂດຍ​ເປັນ​ປະທານ​ຂອງ​ທ່ານ ແກ້ວ​ພິລາ​ວັນ ອາ​ໄພ​ລາດ ຮອງ​ເຈົ້າ​ຄອງ ນະຄອນຫຼວງ​ວຽງ​ຈັນ ປະທານ​ອົງການ​ພັດທະນາ ແລະ ບໍລິຫານ​ຕົວ​ເມືອງ​ວຽງ​ຈັນ (​ອພບ) ມີ​ທ່ານ ບຸນ​ແບ່ງ ບົວ​ພັນ ຜູ້​ຈັດການ​ໃຫຍ່​ບໍລິສັດ​ຊີມັງ​ລາວ ທ່ານ ຊິນນະ​ກອນ ຈັນທາ ກຳມະການ​ຜູ້​ຈັດການ ບໍລິສັດ ຣາ​​ຊ-ລາວ​ບໍລິການ ຈຳກັດ ພ້ອມ​ດ້ວຍ​ຜູ້​ບໍລິຫານ​ບໍລິສັດ​ຂວັນ​ເມືອງ​ກຣຸບ ແລະ ຄະນະ​ທີ່​ປຶກສາ​ດ້ານ​ເຕັກນິກ ແລະ ການ​ອອກ​ແບບ​ໂຄງການ​ຈາກ​ປະເທດ​ໄທ​ເຂົ້າ​ຮ່ວມ.

ທ່ານ ແກ້ວ​ພິລາ​ວັນ ອາ​ໄພ​ລາດ ໄດ້​ກ່າວ​ວ່າ: ນະຄອນຫຼວງ​ວຽງ​ຈັນ ເປັນ​ເມືອງ​ທີ່​ມີ​ຄວາມ​ສຳຄັນ​ຂອງ ​ສປປ ລາວ ມີ​ເນື້ອທີ່​ປະມານ 3.920 ຕາ​ກິໂລແມັດ ປະຊາກອນ​ຫຼາຍ​ກວ່າ 800.000 ຄົນ ຕາມ​ຕົວ​ຊີ້​ວັດ​ການ​ຜັນ​ຂະຫຍາຍ​ດ້ານ​ເສດຖະກິດ​ຂອງ​ນະຄອນຫຼວງ​ວຽງ​ຈັນ ເຕີບ​ໂຕ​ຫຼາຍ​ກວ່າ​ຮ້ອຍ​ລະ 10 ສົ່ງ​ຜົນ​ໃຫ້​ມີ​ປະລິມານ​ຂີ້​ເຫຍື້ອ​ເກີດ​ຂຶ້ນ​ຫຼາຍ​ກວ່າ 300-400 ໂຕນ​ຕໍ່​ວັນ ເຊິ່ງ​ປັດຈຸບັນ ສາມາດ​ກຳຈັດ​ໄດ້​ວັນ​ລະ 250-300 ໂຕນ​ຕໍ່​ວັນ ກອງ​ປະຊຸມ​ຄັ້ງ​ນີ້​ຈະ​ໄດ້​ປຶກສາ​ຫາລື ເພື່ອ​ພ້ອມ​ກັນ​ຊອກ​ວິທີ​ທາງ​ແກ້​ໄຂ​ບັນຫາ​ຂີ້​ເຫຍື້ອ ເພາະວ່າ​ຂີ້​ເຫຍື້ອ​ຢູ່​ນະຄອນຫຼວງ​ວຽງ​ຈັນ ແມ່ນ​ນັບ​ມື້​ເພີ່ມ​ຂຶ້ນ​ໃນ​ແຕ່​ລະ​ວັນ ຕາມ​ອັດຕາ​ສ່ວນ​ເພີ່ມ​ຂອງ​ປະຊາກອນ.

ນະຄອນຫຼວງ​ວຽງ​ຈັນ ໄດ້​ມອບ​ໝາຍ​ວຽກ​ດັ່ງກ່າວ​ນີ້​ໃຫ້ ​ອພບ ເປັນ​ຜູ້​ຄຸ້ມ​ຄອງ ໃນ​ຖານະ​ຜູ້​ເຮັດ​ໃຫ້​ຕົວ​ເມືອງ​ວຽງ​ຈັນ ມີ​ຄວາມ​ສະອາດ​ເປັນ​ລະບຽບ​ຮຽບ​ຮ້ອຍ ຄວນ​ໄດ້​ມີ​ບົດບາດ​ປະສານ​ສົມທົບ​ກັບ​ທຸກ​ພາກສ່ວນ ທັງ​ພາກ​ລັດ ແລະ ເອກະ​ຊົນ ເພື່ອ​ປະສານ​ງານ​ກັບ​ໂຄງການ​ພັດທະນາ​ຂີ້​ເຫຍື້ອ ໃນ​ນະຄອນຫຼວງ​ວຽງ​ຈັນ ໃຫ້​ສາມາດ​ນຳ​ມາ​ໃຊ້​ໃນ​ໂຮງງານ​ອຸດສາຫະກຳ ໂຮງງານ​ຊີມັງ​ລາວ ຫຼື ໃນ​ໂຮງງານ​ອຸດສາຫະກຳ​ອື່ນໆ ໂດຍ​ບໍ່​ສົ່ງ​ຜົນ​ກະທົບ​ຕໍ່​ສິ່ງແວດລ້ອມ​ໃດໆ ແລະ ເປັນຕົ້ນ​ແບບ​ທີ່​ດີ​ໃນ​ການ​ຮ່ວມ​ມື ຮ່ວມ​ແນວ​ຄິດ ຮ່ວມ​ການ​ກະທຳ ແລະ ຮ່ວມ​ຮັບຜິດຊອບ.

ທີ່ມາ: http://www.vientianemai.net/teen/khao/1/11961

ລາວ-ຈີນ ຮ່ວມກັນສຶກສາການສ້າງພະລັງງານລົມ ແລະ ແສງຕາເວັນໃນລາວ

ໃນ​ວັນ​ທີ 13 ມັງກອນ 2014 ຢູ່​ທີ່​ໂຮງແຮມ​ລາວ​ພລາ​ຊາ ນະຄອນຫຼວງ​ວຽງ​ຈັນ ສະ​ຖາ​ບັນ​ສົ່ງເສີມ​ພະລັງງານ​ທົດ​ແທນ ກະຊວງ​ພະລັງງານ ແລະ ບໍ່​ແຮ່​ຂອງ​ລາວ ແລະ ບໍລິສັດ ໄຟຟ້າ​ນ້ຳຕົກ​ຂອງ ​ສປ ຈີນ ໄດ້​ຮ່ວມ​ກັນ​ເຊັນ​ບົດ​ບັນທຶກ​ກ່ຽວ​ກັບ​ການ​ສຶກ​ສາ​ແຜນ​ແມ່​ບົດ ເພື່ອ​ນຳ​ໃຊ້​ພະລັງງານ​ລົມ ແລະ ແສງ​ຕາເວັນ​ໃນ​ລາວ ໃຫ້​ກຽດ​ລົງ​ນາມ​ໃນ​ບົດ​ບັນທຶກ​ດັ່ງກ່າວ ຕາງໜ້າ​ຝ່າຍ​ລາວ ໂດຍ​ທ່ານ ຫັດສະດີ ສີ​ສຸ​ລາດ ຫົວໜ້າ​ສະ​ຖາ​ບັນ​ສົ່ງເສີມ​ພະລັງງານ​ທົດ​ແທນ ຕາງໜ້າ​ຝ່າຍ​ບໍລິສັດ​ໂດຍ​ທ່ານ ​ດຣ. ເຊັນ ກວນ​ຟູ ຮອງ​ປະທານ​ບໍລິສັດ ໄຟຟ້າ​ນ້ຳຕົກ​ຂອງ ​ສປ ຈີນ ມີ​ພາກສ່ວນ​ກ່ຽວຂ້ອງ​ທັງ​ສອງ​ຝ່າຍ ເຂົ້າ​ຮ່ວມ​ເປັນ​ສັກຂີ​ພິຍານ.

ໃນ​ການ​ຮ່ວມ​ມື​ຄັ້ງ​ນີ້ ທັງ​ສອງ​ຝ່າຍ​ຈະ​ໄດ້​ພ້ອມ​ກັນ​ສຳ​ຫຼວດ​ພື້ນ​ທີ່​ຕົວ​ຈິງ ໃນ​ຂອບ​ເຂດ​ທົ່ວ​ປະເທດ ເພື່ອ​ຊອກ​ຫາ​ຈຸດ​ທີ່​ເໝາະ​ສົມ ໃນ​ການ​ພັດທະນາ​ພະລັງງານ​ລົມ ແລະ ແສງ​ຕາເວັນ ໃຫ້​ສາມາດ​ເຊື່ອມ​ຕໍ່​ເຂົ້າ​ກັບ​ລະບົບ​ຕາ​ຂ່າຍ​ໄຟຟ້າ​ລາວ ໂດຍ​ການ​ສຳ​ຫຼວດ ທາງ​ບໍລິສັດ​ຈະ​ໃຫ້ການ​ສະໜັບສະໜູນ​ດ້ານ​ທຶນຮອນ ແລະ ບຸກ​ຄະລາ​ກອນ ຊຶ່ງ​ໃນ​ເບື້ອງ​ຕົ້ນ ໄດ້​ສຳເລັດ​ການ​ສຶກ​ສາ​ຄວາມ​ເປັນ​ໄປ​ໄດ້​ຢູ່​ສອງ​ຈຸດ​ຄື: ເມືອງ​ນອງ ແລະ ເມືອງ​ຊົນ​ບູ​ລີ ແຂວງ​ສະຫວັນ​ນະ​ເຂດ ການ​ພັດທະນາ​ພະລັງງານ​ແສງ​ຕາເວັນ​ຢູ່ ​ສປປ ລາວ ໃນ​ໄລຍະ​ຜ່ານ​ມາ ແມ່ນ​ເລັ່ງ​ໃສ່​ຂະຫຍາຍ​ລະບົບ​ໄຟຟ້າ​ແສງ​ຕາເວັນ ຢູ່​ເຂດ​ຫ່າງ​ໄກ​ສອກຫຼີກ ບ່ອນ​ທີ່​ຕາ​ຂ່າຍ​ໄຟຟ້າ​ຂະຫຍາຍ​ເຂົ້າ​ບໍ່​ເຖິງ.

ໃນ​ໂອກາດ​ນີ້ ທ່ານ ຫັດສະດີ ສີ​ສຸ​ລາດ ໄດ້​ກ່າວ​ວ່າ: ​ສປປ ລາວ ເປັນ​ປະເທດ​ທີ່​ມີ​ທ່າແຮງ​ດ້ານ​ພະລັງງານ​ແສງ​ຕາເວັນ ແລະ ພະລັງງານ​ລົມ ໂດຍ​ສະເພາະ​ແມ່ນ​ຢູ່​ເຂດ​ພາກ​ໃຕ້ ແຕ່​ວ່າ​ພວກ​ເຮົາ​ຍັງ​ຂາດ​ລະບຽບ​ໃນ​ການ​ສົ່ງເສີມ​ສະເພາະ ຂາດທຶນ​ຮອນ ແລະ ຂໍ້​ມູນ ດັ່ງນັ້ນ ລັດຖະບານ​ລາວ ກໍ່​ຄື​ກະຊວງ​ພະລັງງານ ແລະ ບໍ່​ແຮ່ ຈຶ່ງ​ໄດ້​ຮ່ວມ​ມື​ກັບ​ພາກ​ເອກະ​ຊົນ ໃນ​ການ​ພັດທະນາ​ໂຄງການ​ພະລັງງານ​ທົດ​ແທນ ໃຫ້​ສາມາດ​ເຊື່ອມ​ຕໍ່​ເຂົ້າ​ກັບ​ລະບົບ​ຕາ​ຂ່າຍ​ໄຟຟ້າ ຫຼື ປະສົມ​ປະສານ​ກັບ​ການ​ນຳ​ໃຊ້​ພະລັງງານ​ອື່ນໆ.

http://www.vientianemai.net/teen/khao/1/10978

ເລີ່ມ​ສຳ​ຫຼວດ​ໂຄງ­ການ​ເຂື່ອນ​ໄຟ­ຟ້າ​ນ້ຳ­ຕົກ ນ້ຳ​ເທີນ 4

ວັນ​ທີ 26 ມິ­ຖຸ­ນາ 2013 ທີ່ຜ່ານ​ມາ ທີ່​ກະ­ຊວງ​ແຜນ­ການ ແລະ ການ​ລົງ­ທຶນ ໄດ້​ຈັດ​ພິ­ທີເຊັນບົດ​ບັນ­ທຶກ​ຄວາມ​ເຂົ້າ­ໃຈ (MOU) ຂອງ​ໂຄງ­ການ​ເຂື່ອນ​ໄຟຟ້າ​ນ້ຳ­ຕົກ ນ້ຳ​ເທີນ 4 ລະ­ຫວ່າງ ລັດ­ຖະ­ບານ ແຫ່ງ ສປປ ລາວ ກັບ​ບໍ­ລິ­ສັດ​ເອ​ັສ​ເອ​ັສ​ພີ​ທີ ອອກແບບ​ກໍ່­ສ້າງ​ເຄ­ຫາ ​ຈຳ­ກັດ.

ທ່ານ ດຣ.ບຸນ​ທະ­ວີ ສີ​ສຸ­ພັນທອງ ລັດ­ຖະ­ມົນ­ຕີ​ຊ່ວຍ​ວ່າ­ການກະ­ຊວງ​ແຜນ­ການ ແລະ ການລົງ­ທຶນ ​ເປັນ​ຜູ້­ຕາງ­ໜ້າ​ໃຫ້​ແກ່​ລັດຖະ​ບານ ແຫ່ງ ສປປ ລາວ ເຊັນບົດ​ບັນ­ທຶກ ແລະ ເຊັນ​ເປັນ​ພະຍານ ໂດຍ​ທ່ານ ຈັນ­ທະ​ບູ ສຸກ​ອາລຸນ ຮອງ​ຫົວ­ໜ້າ​ກົມ​ທຸ­ລະ​ກິດ​ພະລັງ​ງານ ກະ­ຊວງ​ພະ­ລັງ­ງານ ແລະ ບໍ່​ແຮ່ ແລະ ທ່ານ ບຸນ​ມາ ບຸຈະ­ເລີນ ຫົວ­ໜ້າ​ແຜນ­ການ ແລະ ການ​ລົງ­ທຶນ​ແຂວງ​ບໍ​ລິ​ຄຳ​ໄຊ ກັບບໍ­ລິ­ສັດ​ເອ​ັສ​ເອ​ັສ​ພີ​ທີ ອອກ​ແບບກໍ່­ສ້າງ​ເຄ­ຫາ ​ຈຳ­ກັດ ຕາງ­ໜ້າໂດຍ​ທ່ານ ພອນ​ເທບ ວິ­ໄລ​ສັກ ຮອງ​ຜູ້­ອຳ­ນວຍ­ການ​ບໍ­ລິ­ສັດ​ເອ​ັສເອ​ັສ​ພີ​ທີ ອອກແບບ​ກໍ່­ສ້າງ​ເຄ­ຫາ ຈຳ­ກັດ ແລະ ເຊັນ​ເປັນ​ພະ­ຍານ ໂດຍ​ທ່ານ ຄຳ​ລ້ານ ສີ​ສຸ­ພັນ​ທອງ ຜູ້­ອຳ­ນວຍ­ການ​ບໍ­ລິ­ສັດ​ເອ​ັສ​ເອ​ັສພີ​ທີ ອອກ​ແບບ​ກໍ່­ສ້າງ​ເຄ­ຫາ ​ຈຳກັດ ເຂົ້າ​ຮ່ວມ​ເປັນ​ສັກ­ຂີພິ­ຍານໃນ​ການ​ລົງ​ນາມ​ມີ​ທ່ານ ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ​ຊ່ວຍ​ວ່າການກະ­ຊວງພະ­ລັງ­ງານ ແລະ ບໍ່​ແຮ່ ຫົວ­ໜ້າ​ຫ້ອງ​ວ່າ­ການແຂວງ​ບໍ​ລິ​ຄຳ​ໄຊ ແລະ ພາກສ່ວນ​ທີ່​ກ່ຽວ­ຂ້ອງ​ທັງ​ສອງ​ຝ່າຍ ເຂົ້າ​ຮ່ວມ.

ສຳ­ລັບ​ການ​ສຳ​ຫຼວດ​ອອກແບບ​ໂຄງ­ການ​ເຂື່ອນ​ໄຟ­ຟ້າ​ນ້ຳຕົກ ນ້ຳ​ເທີນ 4 ນີ້ ແມ່ນ​ຈະເລີ່ມລົງ­ມື​ນັບ​ຕັ້ງ­ແຕ່​ມື້​ທີ່​ໄດ້​ລົງ​ນາມເປັນ­ຕົ້ນ​ໄປ ກຳ­ນົດ 18 ເດືອນ ໃນການ​ສຶກ​ສາ­ຜົນກະ­ທົບ​ທາງ​ສິ່ງແວດ​ລ້ອມ​ເສດ­ຖະ­ກິດ-ສັງ­ຄົມ ແລະ ອື່ນໆ ເຂື່ອນ​ດັ່ງ­ກ່າວ​ມີ​ກຳລັງ​ການຜະ­ລິດ​ໄຟ­ຟ້າ 80 ກິ​ໂລວັດ.

ທີ່ມາ:  http://www.vientianemai.net/teen/khao/1/9683