Archive

Posts Tagged ‘ແຂວງຫົວພັນ’

ເຂື່ອນໄຟຟ້ານ້ຳສິມ ຈະສ້າງສຳເລັດ ປີ 2013

ພິ­ທີ​ເຊັນ​ສັນ­ຍາ​ສຳ​ປະ­ທານ (CA) ໂຄງ­ການ​ເຂື່ອນ​ໄຟ­ຟ້າ​ນ້ຳ­ຕົກ​ນ້ຳ​ສິມ ແຂວງ​ຫົວ­ພັນ ລະ­ຫວ່າງ​ລັດ­ຖະ­ບານ ແຫ່ງ ສປປ ລາວ ກັບ​ບໍ­ລິ­ສັດ ນ້ຳ​ສິມ ພາວ​ເວີ ຈຳ­ກັດ ແລະ ພິ­ທີ​ເຊັນ​ສັນ­ຍາ​ຊື້-ຂາຍ​ໄຟ­ຟ້າ ລະ­ຫວ່າງ ລັດ​ວິ​ສາ​ຫະ​ກິດ​ໄຟ­ຟ້າ​ລາວ ແລະ ບໍ­ລິ­ສັດ ນ້ຳ​ສິມ ພາວ​ເວີ ຈຳ­ກັດ ໄດ້​ມີ​ຂຶ້ນ​ຕອນ​ຄ່ຳ​ວັນ​ທີ13 ມິ­ຖຸ­ນາ 2011 ທີ່​ໂຮງ­ແຮມ​ລາວ​ພລາ​ຊາ ນະ­ຄອນ­ຫຼວງ​ວຽງ​ຈັນ

ການ​ຮ່ວມ​ລົງ​ນາມ​ໃນ​ສັນ­ຍາ​ສຳ​ປະ­ທານ​ໂຄງ­ການ​ຕາງ­ໜ້າ​ໃຫ້​ລັດ­ຖະ­ບານ​ລາວ ແມ່ນ​ທ່ານ ທອງ​ມີ ພົມ​ວິ​ໄຊ ລັດ­ຖະ­ມົນ­ຕີ​ຊ່ວຍ​ວ່າ­ການ​ກະ­ຊວງ​ແຜນ­ການ ແລະ ການ​ລົງ­ທຶນ ຕາງ­ໜ້າ​ຝ່າຍ​ບໍ­ລິ­ສັດ​ແມ່ນ​ທ່ານ ໂອ​ວີ ບູ​ເກ້ ຜູ້­ອຳ­ນວຍ­ການ​ບໍ­ລິ­ສັດ ນ້ຳ​ສິມ ພາວ​ເວີ ແລະ ຮ່ວມ​ລົງ​ນາມ​ສັນ­ຍາ​ຊື້-ຂາຍ​ໄຟ­ຟ້າ ແມ່ນ​ທ່ານ ຄຳ​ມະ­ນີ ອິນ​ທິ​ລາດ ຜູ້­ອຳ­ນວຍ­ການ​ລັດ​ວິ​ສາ​ຫະ​ກິດ​ໄຟ­ຟ້າ​ລາວ ແລະ ທ່ານ ໂອ​ວີ ບູ​ເກ້ ຜູ້­ອຳ­ນວຍ­ການ​ບໍ­ລິ­ສັດ ນ້ຳ​ສິມ ພາວ​ເວີ ຊຶ່ງ​ມີ​ທ່ານ ສົມ­ບູນ ລາ­ຊາ​ສົມ­ບັດ ລັດ­ຖະ­ມົນ­ຕີ​ຊ່ວຍ​ວ່າ­ການ​ກະ­ຊວງ​ພະ­ລັງ­ງານ ແລະ ບໍ່​ແຮ່ ບັນ­ດາ​ຫົວ­ໜ້າ​ຫ້ອງ­ການ ຫົວ­ໜ້າ​ກົມ ອຳ­ນາດ​ການ​ປົກ­ຄອງ​ທ້ອງ­ຖິ່ນ ກໍ​ຄື​ພາກ­ສ່ວນ​ທີ່​ກ່ຽວ­ຂ້ອງ​ທັງ​ສອງ​ຝ່າຍ​ເຂົ້າ​ຮ່ວມ.

ໂຄງ­ການ​ດັ່ງ­ກ່າວ​ແມ່ນ​ໄດ້​ອະ­ນຸ­ຍາດ​ການ​ລົງ­ທຶນ​ຈາກ​ລັດ­ຖະ­ບານ​ລາວ ໃນ​ການ​ສຶກ​ສາ​ສຳ​ຫຼວດ​ຄວາມ​ເປັນ​ໄປ​ໄດ້​ທາງ​ດ້ານ ເສດ­ຖະ­ກິດ ເຕັກ­ນິກ ແລະ ໄດ້​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ​ກັນ ໃນ​ວັນ​ທີ 14/2/2003 ສຳ­ເລັດ​ການ​ສຶກ​ສາ​ທາງ​ດ້ານ​ເສດ­ຖະ­ກິດ-ເຕັກ­ນິກ ໃນ​ປີ 2006 ເຊັນ​ສັນ­ຍາ​ພັດ­ທະ­ນາ​ໂຄງ­ການ​ກັບ​ລັດ­ຖະ­ບານ​ລາວ ໃນ​ວັນ​ທີ 2/10/2007.

ໂຄງ­ການ​ໄຟ­ຟ້າ​ນ້ຳ­ຕົກ​ນ້ຳ​ສິມ ແມ່ນ​ໂຄງ­ການ​ຂະ­ໜາດ​ນ້ອຍ ມີ​ກຳ­ລັງ​ຕິດ​ຕັ້ງ 9 ເມ​ກາ​ວັດ (MW) ຕັ້ງ​ຢູ່​ລະ­ຫວ່າງ​ບ້ານ​ກາງ​ເມືອງ ຫາ​ບ້ານ​ດ່ານ​ເປົ້າ ເມືອງ​ວຽງ​ໄຊ ແຂວງ​ຫົວ­ພັນ ຫ່າງ​ຈາກ​ຕົວ​ເມືອງ​ຊຳ​ເໜືອ ປະ­ມານ 50 ກິ­ໂລ­ແມັດ ເປັນ​ເຂື່ອນ​ຄອນ​ກຣີດ ຍາວ 25 ແມັດ ແລະ ສູງ 6 ແມັດ ພ້ອມ​ດ້ວຍ​ຝາຍ​ນ້ຳ​ລົ້ນ​ທີ່​ໃຫ້​ນ້ຳ​ໄຫຼ​ຜ່ານ​ໄດ້​ໃນ​ລະ­ດູ­ຝົນ ອ່າງ­ເກັບ­ນ້ຳ​ມີ​ຂະ­ໜາດ​ປະ­ມານ 3 ເຮັກ­ຕາ ແລະ ມີ​ອຸ​ໂມງ​ຄວາມ​ຍາວ 1.100 ແມັດ ເພື່ອ​ອວຍ​ນ້ຳ​ໄປ​ຜະ­ລິດ​ໄຟ­ຟ້າ ຊຶ່ງ​ມີ​ຄວາມ​ສູງ​ຂອງ​ນ້ຳ­ຕົກ 172 ແມັດ ມີ​ເຄື່ອງ​ປັ່ນ​ໄຟ ຈຳ­ນວນ 2 ໝ່ວຍ ແລະ ມີ​ມູນ​ຄ່າ​ການ​ກໍ່­ສ້າງ 18 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 144 ຕື້​ກີບ ໂຄງ­ການ​ສຳ​ປະ­ທານ​ເຂື່ອນ​ໄຟ­ຟ້າ​ດັ່ງ­ກ່າວ ຊຶ່ງ​ປະ­ກອບ​ມີ​ບໍ­ລິ­ສັດ​ນໍ​ພາວ​ເວີ ແຫ່ງ ປະ­ເທດ​ນັອກ​ແວ ຖື​ຫຸ້ນ 75% ແລະ ລັດ­ຖະ­ບານ​ລາວ ໂດຍ​ແມ່ນ​ລັດ​ວິ​ສາ​ຫະ​ກິດ​ກໍ່­ສ້າງ ແລະ ຕິດ​ຕັ້ງ​ໄຟ­ຟ້າ​ຖື​ຫຸ້ນ 25% ມີ​ອາ­ຍຸ​ສຳ​ປະ­ທານ 25 ປີ ການ​ກໍ່­ສ້າງ​ຄາດ​ວ່າ​ຈະ​ໃຫ້​ສຳ­ເລັດ​ທ້າຍ​ປີ 2013.

ພາຍ­ຫຼັງ​ສຳ­ເລັດ​ການ​ກໍ່­ສ້າງ​ໂຄງ­ການ​ດັ່ງ­ກ່າວ ຈະ​ຂາຍ​ກະ­ແສ​ໄຟ­ຟ້າ​ໃຫ້​ລັດ​ວິ​ສາ​ຫະ​ກິດ​ໄຟ­ຟ້າ​ລາວ ທັງ​ໜົດ​ທີ່​ມີ​ກຳ­ລັງ​ການ​ຜະ­ລິດ 32.500 GKWh ຕໍ່​ປີ (ກິກ​ກາ​ວັດ​ໂມງ​ຕໍ່​ປີ) ດ້ວຍ​ແຮງ​ດັນ 22 ກິ​ໂລ​ໂວນ (KV) ຊຶ່ງ​ຈຸດ­ປະ­ສົງ​ຂອງ​ການ​ຊື້​ກະ­ແສ​ໄຟ­ຟ້າ​ຈາກ​ໂຄງ­ການ​ນີ້ ກໍ​ເພື່ອ​ເປັນ​ການ​ຫຼຸດ­ຜ່ອນ​ການ​ຊື້​ໄຟ­ຟ້າ​ເຂົ້າ​ມາ​ຈາກ​ຕ່າງ­ປະ­ເທດ.

http://www.vientianemai.net/teen/khao/1/3367

ເຊັນ​ສັນຍາ​ໂຄງການ​ກໍ່ສ້າງ​ຕາ​ຂ່າຍ​ໄຟຟ້າ ​ເຂົ້າ​ເຂດ​ແວ່ນ ​ແລະ ​ເຂດ​ຫ້ວຍ​ໂຄ້ ​ເມືອງ​ຊຳ​ເໜືອ

ປະຊາຊົນເຂດແວ່ນ ແລະ ເຂດຫ້ວຍໂຄ້ ເມືອງຊຳເຫນືອ ແຂວງຫົວພັນ ກຳລັງຈະໄດ້ຊົມໃຊ້ໄຟຟ້າຢ່າງຖາວອນແລ້ວ ພາຍຫລັງທີ່ກະຊວງພະລັງງານ-ບໍ່ແຮ່ ແລະ ບໍລິສັດຜູ້ຮັບເຫມົາກໍ່ສ້າງ ໄດ້ຮ່ວມກັນລົງນາມ ໃນສັນຍາໂຄງການກໍ່ສ້າງຕາຂ່າຍໄຟຟ້າ ແລະ ຕິດຕັ້ງຫມໍ້ແປງເຂົ້າເຂດດັ່ງກ່າວ.

ພິທີເຊັນສັນຍາໄດ້ຈັດຂຶ້ນໃນວັນທີ 21 ມັງກອນ 2011 ນີ້, ທີ່ນະຄອນຫລວງວຽງຈັນ ເຊິ່ງຝ່າຍກະຊວງພະລັງງານ-ບໍ່ແຮ່ ແມ່ນໄດ້ຖືກເຊັນໂດຍ ທ່ານ ຈະເລີນ ອິນທະວີ ຮອງຫົວຫນ້າຫ້ອງການ ກະຊວງພະລັງງານ-ບໍ່ແຮ່ ແລະ ທ່ານ ດຣ. ພອນວິໄລ ເພັງສີລິຈັນ ຫົວຫນ້າພະແນກພະລັງງານ-ບໍ່ແຮ່ ແຂວງ ຫົວພັນ ສ່ວນຝ່າຍບໍລິສັດຮັບເຫມົາກໍ່ສ້າງ ແມ່ນທ່ານ ເພັດ ວົງຂັນຕີ ອຳນວຍການບໍລິສັດ ເພັດໄລວັນ ການໄຟຟ້າຈຳກັດ ເປັນຜູ້ເຊັນໂດຍຊ້ອງຫນ້າທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ປະຈຳການລັດຖະບານ ພ້ອມດ້ວຍບັນດາແຂກຖືກເຊີນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມເປັນ ສັກຂີພະຍານ. ໂຄງການດັ່ງກ່າວ ເປັນໂຄງການກໍ່ສ້າງຕາຂ່າຍໄຟຟ້າຂະຫນາດ 22 ກິໂລໂວນ(KV) ແລະ 0,4 ກິໂລໂວນ(KV) ເຊິ່ງມີຄວາມຍາວທັງຫມົດ ປະມານ 147 ກວ່າກິໂລແມັດ, ໃນນັ້ນຕາຂ່າຍ 22 ກິໂລໂວນ ມີຄວາມຍາວ 131,1 ກິໂລແມັດ ແລະ ຕາຂ່າຍ 0,4 ກິໂລໂວນ ມີຄວາມຍາວ 16 ກິໂລແມັດ, ສ່ວນການຕິດຕັ້ງຫມໍ້ແປງລວມທັງຫມົດ 37 ຫນ່ວຍ. ໂຄງການນີ້ມີມູນຄ່າທັງຫມົດປະມານ 67 ຕື້ກີບ ເຊິ່ງຈະໃຊ້ເວລາກໍ່ສ້າງປະມານ 28 ເດືອນ ຈຶ່ງຈະສຳເລັດ.

ໂຄງການຂະຫຍາຍຕາຂ່າຍໄຟຟ້າ 22 ກິໂລໂວນ 0,4 ກິໂລໂວນ ແລະ ຕິດຕັ້ງຫມໍ້ແປງເຂົ້າເຂດແວ່ນ ແລະ ເຂດຫ້ວຍໂຄ້ ເມືອງຊຳເຫນືອ ແຂວງຫົວພັນ
ແມ່ນນອນຢູ່ໃນແຜນພັດທະນາລະບົບໄຟຟ້າ ຂອງລັດຖະບານຫລັງຈາກໂຄງການສຳເລັດແລ້ວ ຈະເຮັດໃຫ້ປະຊາຊົນໃນສອງເຂດດັ່ງກ່າວຈຳນວນ 37 ບ້ານ
ມີ 1.436 ຄອບຄົວ ມີໄຟຟ້າໃຊ້ຢ່າງຖາວອນ./.

http://www.pasaxon.org.la/conten/24-1-11/5.htm

ຫົວພັນ: ປະຊາຊົນ​ໃນ 204 ບ້ານ​ໄດ້​ຊົມ​ໃຊ້​ໄຟຟ້າ​ແລ້ວ

ທ່ານ ຟອງປະສິດ ເພັດສີສຸກ ຫົວຫນ້າລັດວິສາຫະກິດໄຟຟ້າລາວສາຂາແຂວງຫົວພັນ, ລາຍງານຕໍ່ກອງປະຊຸມສະຫລຸບການຈັດຕັ້ງປະຕິບັດວຽກງານໄຟຟ້າ
ປະຈຳປີ 2010 ທີ່ແຂວງຫົວພັນເມື່ອບໍ່ດົນມານີ້ວ່າ: ປະຈຸບັນມີ 204 ບ້ານຢູ່ແຂວງຫົວພັນໄດ້ມີໄຟຟ້າໃຊ້ຢ່າງຖາວອນແລ້ວ, ຈຳນວນບ້ານທີ່ມີໄຟຟ້າໃຊ້ແມ່ນກວມ
ເອົາ 27,64% ຂອງຈຳນວນບ້ານທັງຫມົດ ແລະ ກວມເອົາ 38,06% ຂອງຄອບຄົວພາຍໃນແຂວງ.

ທ່ານຫົວຫນ້າສາຂາຍັງແຈ້ງໃຫ້ຊາບ ເຖິງທິດທາງຂະຫຍາຍໄຟຟ້າຢູ່ແຂວງດັ່ງກ່າວ ໃນປີ 2011 ວ່າ: ຈະສູ້ຊົນເຮັດໃຫ້ຕົວເລກບ້ານທີ່ມີໄຟຟ້າໃຊ້ເພີ່ມຂຶ້ນເປັນ
47,02% ເຮັດໃຫ້ຄອບຄົວມີໄຟຟ້າໃຊ້ກວມ 54,75%, ປີ 2010 ຜ່ານມາແຂວງຫົວພັນໄດ້ນຳເຂົ້າກະແສໄຟຟ້າຈາກປະເທດເພື່ອນບ້ານ 13.114 ລ້ານກິໂລວັດໂມງ,
ລື່ນແຜນການທີ່ກຳນົດໄວ້ 719.000 ກິໂລວັດໂມງ.

http://www.pasaxon.org.la/conten/10-1-11/news9.htm

Follow

Get every new post delivered to your Inbox.